Sağlamlıq məsələsində nə qədər diqqətli davranılsa da, zaman-zaman gözlənilməz vəziyyətlərlə qarşılaşmaq ehtimalı var. Endometrioz isə işləri yalnız diaqnoz və müalicə baxımından deyil, duyğusal olaraq güclü olmaq baxımından da daha mürəkkəb hala gətirə bilər. Duyğusal dayanıqlıq endometriozlu xəstələr üçün önəmli bir öhdəsindən gəlmə mexanizmidir.
Duyğusal dayanıqlıq həyat boyu qarşılaşılan müxtəlif stress amillərinə tab gətirmək və onlara uyğunlaşma qabiliyyəti kimi təsvir edilə bilər. Başqa sözlə, duyğusal dayanıqlıq xəstəlik, şəxsi bir hadisə və ya gözlənilməz şəxsi maliyyə krizləri ilə əlaqəli travma və stresə uyğunlaşma prosesidir.
Lakin duyğusal dayanıqlıq xəstənin stress yaşamayacağı mənasına gəlmir. Əsasən söhbət həmin stress amillərinin həyat keyfiyyətinə təsir etməsinə imkan verməyən sağlam öhdəsindən gəlmə mexanizmləri yaratmaqdan gedir. Bununla belə duyğusal dayanıqlığın yaradılması və artırılması üçün vaxt, səy və müvəffəq olma istəyinin lazım olduğu unudulmamalıdır.
Endometrioz Duyğusal Dalğalanmalara Səbəb Ola Bilər
Endometriozun duyğusal təsiri adətən yetkinlik dövrünün başlanğıcından etibarən hiss olunur. Bir çox gənc qız yaşadığı aybaşı ağrısının normal olduğu, ağrıkəsicilərlə sakitləşdirilə biləcəyi və zamanla keçəcəyi fikrində olduğu üçün diaqnoz və müalicə gecikir.
Endometrioz duyğusal sağlamlıq üzərində böyük təsir yaradaraq qadınların həyat keyfiyyətinə mənfi təsir edə bilər. Endometriozlu xəstələrdə ümumi əlamətlər görülsə də, hər xəstənin duyğusal yolculuğu və yaşadığı duyğusal qarışıqlıqla öhdəsindən gəlmə strategiyası unikaldır. Xüsusilə insanların ağrı ilə necə mübarizə apardıqları və özlərini necə ifadə etdikləri məsələsində böyük fərqlər var.
Sosial Münasibətlər Qurmağın Önəmi Nəzərdən Qaçırılmamalı
Endometriozlu xəstələrin təmasda olduğu hər kəs xəstənin vəziyyətinə qarşı empatik olmaya bilər. Lakin anlayışlı və dəstəkləyici dostlara və ailə üzvlərinə sahib olmaq ən pis əlamətlər zamanı belə xəstənin özünü təcrid etməsinin qarşısını ala bilər.
Endometrioz narahatlıq və depressiyaya səbəb ola bilər. Bununla mübarizə aparmaq üçün uyğun həyat tərzi dəyişiklikləri etmək tövsiyə olunur. Mənfilikdən mümkün olduğunca uzaq durmaq və bir həyat məqsədi müəyyən etmək faydalı ola bilər. Bundan başqa zehin üzərində sakitləşdirici təsiri olan yoqa və meditasiya kimi üsullara müraciət edilə bilər.
Endometriozlu xəstə bir tərəfdən həyat keyfiyyətini qoruyarkən, digər tərəfdən də özünü rahat hiss etmək üçün iş və istirahət rejimi qurmalıdır. Sağlam bədən və zehin üçün sağlam qidalanmanın nə qədər önəmli olduğu unudulmamalıdır. Endometriozun iltihabi bir xəstəlik olması səbəbindən balanslı iltihabəleyhinə pəhrizin tətbiq edilməsi fayda verə bilər. Bu çərçivədə iltihabı artıra bilən emal olunmuş qida, alkoqol, kofein, qazlı və şəkərli içkilər, süd məhsulları, soya, taxıllar və qlüten, yağlı qidalar və qırmızı ət qəbulundan uzaq durulmalıdır. Ağrının və iltihabın azaldılmasına kömək etmək xəstəliyi müalicə etməsə də, həyat keyfiyyətini artıraraq xəstəliklə mübarizə aparmaq baxımından güc verə bilər.