Mioma qadın sağlamlığını təhdid edir
Mioma uşaqlığın və uşaqlıq boynunun içində və ya ətrafında inkişaf edən anormal, hamar əzələ kütləsidir. Sağlamlıq üçün ciddi təhlükə yarada, anormal uşaqlıq yolu qanaxmasına, sonsuzluğa və ya düşüklərə səbəb ola bilər.
Xalq arasında şişlər xərçənglə eyniləşdirilsə də, miomaların xərçəngə çevrilmə ehtimalı olduqca aşağıdır. Bununla belə, az da olsa bədxassələşmə ehtimalının olduğu yadda saxlanılmalı və müşahidə diqqətdən kənarda qalmamalıdır. Bəzən adi ginekoloji müayinə zamanı təsadüfən aşkarlanır. Reproduktiv yaşdakı qadında tapıldıqda ciddi problemlərə səbəb ola bilər. Ən çox 35-40 yaş qrupunda görülür. Yeniyetməlik dövründə rast gəlinməsi çox az ehtimallıdır, lakin yaşla birlikdə tezliyi artır.
Miomalar hormon asılı olduğundan estrogen hormonunun təsiri ilə böyüyür və bu böyümə hamiləlik dövründə də davam edə bilər. Hamiləlikdə ağrı kimi bəzi problemlər yarada və degenerasiya adlandırdığımız dəyişiklik səbəbindən ultrasəsdə fərqli görünə bilərlər. Lakin bu vəziyyətlər həmişə baş vermir. Digər tərəfdən, məhz bu hormon asılılığı nəticəsində menopauzadan sonra estrogenin azalması ilə kiçilə də bilərlər.
Adətən müxtəlif əlamətlərlə özünü göstərən miomalar bəzi hallarda heç bir əlamət vermir və adi yoxlamalarda təsadüfən aşkarlanır. Buna görə də miomaların erkən diaqnostikası üçün hərtərəfli və müntəzəm ginekoloji müayinə tələb olunur.
Miomaların əlamətləri
- Aybaşı dövründə güclü qanaxma,
- Anemiya,
- Qarında və çanaqda dolğunluq hissi,
- Cinsi əlaqə zamanı güclü ağrı,
- Bel və büzdüm nahiyəsində ağrı,
- Tez-tez sidiyə getmə ehtiyacı,
- Boruların tutulması (bəzi hallarda)
- Qəbizlik
Miomalar ölçüsündən, sayından və böyümə sürətindən asılı olaraq müxtəlif problemlər yarada bilər. Hər qadında əlamətlər fərqli və fərqli şiddətdə ola bilər.
Güclü əlamətlərə səbəb olduqda və xəstənin gündəlik həyatına mane olduqda əməliyyat lazım gələ bilər. Miomalar cərrahi yolla çıxarıla bilər, lakin əməliyyatdan sonra təkrarlanma riski var. Bir santimetrdən kiçik miomalar əməliyyatdan sonra da qala və zamanla böyüyə bilər.
Miomalar kiçikdirsə və əlamət vermirsə, əməliyyat olmadan yaxından izlənilə bilər. Ciddi problem yaratmayan miomalar üçün klinik müşahidə kifayət edə bilər. Miomaların böyüməyə davam etdiyini nəzərə alsaq, erkən diaqnostika çox əhəmiyyətlidir. Gec diaqnoz qoyulduqda çox böyük ölçülərdə ola və ya ciddi klinik şikayətlərə səbəb ola bilərlər. Bu hallarda cərrahi müdaxilə qaçılmaz olur.
Cərrahi müalicədə açıq əməliyyat mütləqdirmi?
Bu gün miomaların cərrahi müalicəsində minimal invaziv üsullardan tez-tez istifadə olunur. Mioma uşaqlığın daxili qatına yaxındırsa histeroskopiya, daha böyük və dərində yerləşirsə laparoskopik cərrahiyyə üstün tutulur. Son illərdə miomalar üçün robot dəstəkli əməliyyatlar uğurla və tez-tez həyata keçirilir.
Mioma əməliyyatlarında uşaqlıq çıxarılmalıdırmı?
Cavab aydındır: XEYR. Mioma hallarının çoxunda uşaqlığı qorumaq mümkündür. Lakin bu hallarda cərrahi texnikanı tətbiq edən cərrahın təcrübəsi ən mühüm amillərdən biridir. Uşaqlığı qorunan xəstələrdə əməliyyatdan sonrakı müşahidə də çox vacibdir.