Human Papillomavirus cinsi yolla keçən infeksiya növüdür. Qısaca HPV adlandırılan virus qorunmasız cinsi əlaqə səbəbindən keçir. HPV dünyada ən çox rast gəlinən cinsi yolla keçən infeksiyadır.
Təxminən insanların 80%-i həyatlarının bir dövründə HPV daşıyır. Çünki HPV-nin ümumilikdə 150-dən çox fərqli növü var. Bunların böyük əksəriyyəti heç bir əlamətə səbəb olmur və hər hansı müalicəyə ehtiyac olmadan keçir. Hətta çox az insan HPV daşıyıcısı olduğunu fərq edir. Lakin təxminən 40 HPV növü cinsiyyət nahiyəsində infeksiyaya səbəb olur. Bu da uşaqlıq, vagina, vulva, penis və ya anus nahiyəsində ziyil və ya xərçəng şəklində görülür.
HPV və Hamiləlik
Hamiləlik zamanı hər hansı səbəb olmadan, rutin olaraq aparılan bir HPV testi yoxdur. HPV diaqnozu adətən müntəzəm müayinələr zamanı fərq edilən ziyil adlandırılan dəridəki ocaqlarla və ya Pap smir testinin nəticələri ilə qoyulur. Pap smir testində uşaqlıq boynundan fırça ilə az miqdarda hüceyrə nümunəsi götürülərək laboratoriyaya göndərilir.
Bu hüceyrələrdə prekanseroz (xərçəngdən əvvəl) hüceyrələr tapıldıqda HPV olma ehtimalı yüksəkdir. Bununla belə qadınların böyük əksəriyyəti də hamiləlik boyunca hər hansı müalicəyə ehtiyac duymur. Bunun yerinə müalicə prosesi varsa əlamətlərin asan idarə olunmasına yönəlik planlaşdırılır. Ziyil yaranması baş verdikdə belə çox böyük və ya narahatlıq yaradan deyilsə müdaxilə edilmir. Lakin klinik olaraq şikayəti olan xəstələrdə müxtəlif üsullarla təhlükəsiz şəkildə müalicə edilə bilər.
HPV Hamiləlikdə Körpəyə Keçirmi?
HPV körpənin sağlamlığına təsir etmir. Doğuş zamanı HPV-nin körpəyə keçdiyi hallar olduqca nadirdir. Çox nadir hallarda cinsiyyət ziyilləri körpəyə keçə bilər. Bu kimi hallarda körpənin qırtlağında və ya səs tellərində HPV ocaqları (ziyillər) yarana bilər.
Bu nahiyədə ziyil yarandıqda bu vəziyyətə “rekurrent respirator papillomatoz” adı verilir. Cərrahi müdaxilə ilə yaranan ziyillər aradan qaldırıla bilər. HPV əmizdirməyə mane deyil. Bu virusun ana südü ilə körpəyə keçdiyi hallar olsa da, buna çox nadir rast gəlinir və ana südünün körpə üçün dəyəri də nəzərə alındıqda əmizdirməyə mane olan bir vəziyyət olmadığı ifadə edilə bilər.