Laparoskopiya və robot dəstəkli cərrahiyyənin xəstə rahatlığı baxımından fərqləri

Laparoskopiyanın bəzi texniki məsələlərdə məhdudiyyətləri olduğu bilinir. Laparoskopik cərrahiyyədə iki ölçülü görüntü üzərində işlənir; toxunma hissi az da olsa var; hərəkət qabiliyyəti məhduddur. İstifadə olunan alətlər düz çubuq şəklindədir. Bu səbəbdən əl-bilək hərəkətləri məhduddur. 1980-ci illərdə NASA tərəfindən layihələndirilən uzaqdan cərrahi tətbiqlər robot texnologiyasının inkişafına öncülük etmişdir. Günümüzdə istifadə olunan texnologiya 2000-ci illərdə FDA tərəfindən təsdiqlənərək eyni otaq içində cərrahi istifadəyə verilmişdir. Robot dəstəkli cərrahiyyə daha sürətli sağalma, xəstəxanada daha az qalma müddəti, gündəlik həyata daha tez qayıtma və əməliyyat zamanı daha az qanaxma kimi laparoskopik cərrahiyyənin verdiyi bütün üstünlükləri artıqlaması ilə təmin edir. Bundan əlavə, əl biləyi hərəkəti kimi hərəkətlərin edilməsinə robotik sistemin imkan verməsi səbəbindən manevr imkanı laparoskopiyaya nisbətən daha çoxdur və bir çox çətin prosedur 3 ölçülü görüntü altında və oynaq hərəkəti sayəsində rahatlıqla aparıla bilir. Laparoskopiya və robotik sistem müqayisə edildikdə əməliyyat müddətləri arasında böyük fərq yoxdur. Yalnız laparoskopiyada hərəkət məhdudluğu və iki ölçülü mühitdə işlənilməsi robot dəstəkli cərrahiyyəni bir qədər daha önə çıxarır. Robotik sistemdə üç ölçülü görüntü sayəsində mükəmməl görüntü təmin olunur və incə hərəkətləri etmək mümkün olur. Anatomik quruluşlar çox təfsilatlı görünür. Kiçik damar və sinirlər fərq edildiyi üçün daha az qanaxma və daha az toxuma zədəsi yaranır. Üsulun əlavə üstünlükləri təhlükəsizlik, hərəkətlərin çoxyönlü olması, üç ölçülü görüntü, uzaqdan əməliyyata qoşulma və cərrahın oturaraq prosedur aparmasıdır. Robot dəstəkli cərrahiyyədə toxunma hissi olmadığı üçün toxumalara tətbiq olunacaq gücü müəyyən etmək üçün cərrah görüntü işarələrindən faydalanmaq məcburiyyətindədir. Əməliyyatdan əvvəlki quraşdırma xüsusi təcrübə tələb edir. Alət və ya kamera portlarının yerlərinin dəyişdirilməsindəki çətinlik, əməliyyat zamanı xəstənin vəziyyətinin dəyişdirilməsinin vaxt aparması, xəstəyə dərhal müdaxilədəki gecikmələr robot dəstəkli cərrahiyyənin çatışmazlıqlarındandır. Bununla yanaşı, laparoskopiyanın effektiv şəkildə tətbiq oluna bilmədiyi kompleks əməliyyatlarda robot dəstəkli cərrahiyyə seçilə bilər.